Festa Feira do Xamón

O día grande, na Carballeira do Cacharado, ten lugar a degustación de racións elaboradas con xamón, pan e viño, e o concurso de cortadores de xamón. Desde a Casa Consistorial parte o desfile da comitiva do xamón cara á carballeira, acompañado dos centenarios cabezudos da Cañiza e de grupos folk. A zona da feira ambiéntase con pallozas de colmo que lembran os antigos postos, e complétase con desfiles de carros de labranza. É a gran cita gastronómica do municipio, ligada á tradición chacineira da vila.